Press Release
October 4, 2011

Trillanes: Kita ng gobyerno nawala dahil sa Altimax-Globe deal

Pinatitingnan ni Senador Antonio "Sonny" F. Trillanes IV sa National Telecommunications Commission (NTC) kung paano maibabalik ang nawalang kita ng gobyerno sa illegal na pagrenta ng Globe Telecom sa radio frequencies na naunang iginawad sa Altimax Broadcasting Inc.

"Globe has not been paying spectrum users fees (SUFs) to the NTC for its use of the 30 megahertz assigned to Altimax," ani Trillanes.

"If the NTC finds that this arrangement is indeed in violation of existing laws, then the commission should not only stop the illegal use of these frequencies; it should also try to recover the uncollected fees," dagdag pa ng senador.

Ginawa ni Trillanes ang pahayag matapos ang privilege speech ni Senate President Pro Tempore Jose "Jinggoy" Estrada hinggil sa diumano'y maanumalyang lease agreement sa pagitan ng Altimax at Globe noong 2009.

Nauna nang kinuwestyon ni Estrada ang sinasabing paglabag ng Altimax sa iginawad ditong congressional franchise dahil sa hindi nito paggamit ng direct broadcast satellite at multichannel multipoint distribution system (MMDS) na ipinagkaloob ng Kongreso.

Binatikos din ni Estrada ang kompanya sa pagpaparenta nito ng sarili nitong radio frequencies sa Globe na ginagamit naman ng huli para sa wireless broadband internet service na ayon sa senador ay matinding paglabag sa prankisa ng Altimax.

Ayon kay Trillanes, sa ilalim ng 1995 Telecoms Act, ang gobyerno sa pamamagitan ng NTC ay nagpapataw ng taunang spectrum user's fee sa telecommunications companies (telcos) na gumagamit ng radio frequencies na itinalaga sa mga ito ng komisyon.

"Ang broadcast companies ay hindi naman inoobligang bayaran ang SUF. Sa kaso ng Altimax, ang kompanya ay tila napaboran," ayon kay Trillanes.

Dinagdag pa ng senador na noong 2005, sa ilalim ng Memorandum Circular No. 06-08-2005, ang NTC ay nagbigay ng ilang frequency band para sa Broadband Wireless Access (BWA), isang serbisyong ekslusibo sa telcos.

Ang mga kompanyang ito ay nagbabayad sa NTC taun-taon mula P10 milyon hanggang P40 milyon para sa paggamit ng radio frequencies.

Sinabi ni Trillanes na ang frequencies na binigay sa Altimax na 2596-2644 Mhz bandwidth, ay sakop ng NTC memo circular at dapat ay naibahagi sa ilalim ng BWA.

Sa halip na gawin ito, ang NTC ay nag-isyu ng isang kautusan noong June 2009 na nagbibigay sa Altimax ng permiso na gamitin ang MMDS broadcast service na mayroong 30 Mhz spectrum allocation kahit na ang kumpanya ay pumalyang i-roll out ang serbisyo sa loob ng halos isang dekada.

Ayon kay Trillanes, hindi pinagbayad ng NTC ng spectrum fee ang Altimax.

Sa halip, pinarentahan ng Altimax ang frequencies nito sa Globe kapalit ng pagbabayad nito ng P70 milyon at P90 milyong-piso noong 2009 at 2010, base sa Audited Financial Statements noong 2009 na dineklara ng Altimax sa Securities and Exchange Commission (SEC).

"It appears that Altimax and Globe have unduly benefitted from this arrangement at the expense of government," sabi pa ni Trillanes.

Pinasisilip din ni Trillanes sa NTC kung magkano ang nawalang kita ng gobyerno sa mga hindi bayad na SUFs sa ilalim ng nasabing kasunduan sa pagitan ng Altimax at Globe.

Pinagpapaliwanag din ng senador ang NTC sa pagpayag nitong makipagtransaksyon ang Altimax sa isang hybrid na MMDS broadcast/broadband service at sa hindi nito pag-oobliga sa Altimax na magbayad ng SUF di gaya ng ibang kumpanya na obligadong magbayad ng nasabing fee.

Kinuwestyon din niya kung magkano ang dapat sana'y kinita ng gobyerno kung binawi ang frequencies ng Altimax at ginawang parte ng hindi pa naibabahaging BWA/3G frequencies at pinagkaloob sa mga awtorisadong telcos.

"Recalling these frequencies and reassigning them to companies that will pay the proper fees is the way to correct this situation. Beyond that, the NTC should also consider how to recover the fees that should have been collected but were denied the government," diin pa ng batang senador.

News Latest News Feed