Press Release
August 2, 2014

Transcript of Sen. Grace Poe's dzMM Ito Ang Radyo Patrol Interview
Hosted by Ruby Tayag and Noel Alamar

Noel Alamar: Nasa line 1 si Sen. Grace Poe para tulungan tayo dito sa FOI Bill. Magandang hapon po, Sen. Grace.

Sen. Grace Poe: Hi magandang hapon Noel, napaka-sweet naman ng sinabi mo, parang mataas yata na ideal 'yan ah, kailangan talagang pagbutihan ko. Maraming salamat. Magandang hapon Noel at siyempre kay Ms. Ruby, magandang hapon.

Ruby Tayag: Ma'am, kanina nabanggit po namin ni Noel na sa parte ng Senado, wala na po tayong problema sa Freedom of Information Bill dahil naipasa na 'yun sa tulong nga po ninyo. Pero mukhang sa House of Representatives, may mga naririnig po tayo na baka daw po maubusan ng oras dahil dito sa naka-file na impeachment laban sa Pangulong Noynoy Aquino at dahil daw po dito sa budget hearing, baka daw po hindi nila maipasa ang FOI Bill, ano po ang reaksyon niyo dito?

Poe: Palaging may bantang ganyan. Palagi namang pwedeng maging totoo 'yang bantang 'yan kaya nga hindi tayo pwedeng mag relax kahit na sinabi pa ng Pangulo na kasama 'yan sa priority bills, number 18 yan out of 26. So napaka-importante, sa tingin ko naman itong FOI ay lumulutang kumpara doon sa ibang priority bills, sapagkat unang-una ito ay concern, hindi lamang ng media kundi maging ng business community, kaya sa tingin ko, madami namang bills ang pumapasa kasi may public pressure. Kaya 'yun na lang ang inaasahan natin pero sa totoo lang, kapag naabutan kasi ng 2015, halimbawa one year before national elections, mas magiging madalang ang pagpasok ng mga senador at kongresista kasi siyempre kailangan silang bumalik sa kani-kanilang mga distrito kaya baka hindi magkaroon ng quorum. Iyon ang dapat nating bantayan.

Tayag: Ngayon po na may pahayag ang Palasyo na pang-18 ito doon sa mga priority bills, do you think maipapasa within the period ni Pangulong Nonoy Aquino before 2016, considering nga po na a year before or two years before, ngayon pa lang pinag-uusapan na nga po ang kampanya for 2016, kakayanin po ba?

Poe: Sa tingin ko, malaking bagay na binanggit 'yun ng Pangulo. Sa tingin ko, alam naman natin na sa legasiya ng Pangulo, ito ang isa sa pinakamahalaga. Kasi hindi natin matatantya kung anong klaseng administrasyon ang susunod sa administrasyon ng ating Pangulo. Ang freedom of information, kahit sino pa ang nakaupo diyan, ay magbibigay sa atin ng sandata para naman magkaroon tayo ng karapatan na usisain ang mga transaksyon ng gobyerno.

Alamar: Oo katulad nga ng nangyari doon sa DAP, 'yung kung saan-saan ginastos 'yun. Kung kailan nagkaroon na lang ng public clamor tsaka na lang naglabas ng website kung saan talaga napunta ang pondo talaga para doon.

Tayag: Do you think, ma'am, kung nauna pong napagtibay ang Freedom of Information bill tapos na dapat itong isyu ng DAP at nailabas na noon pa man?

Poe: Sa tingin ko kung hindi man tapos na, eh malaking bawas ito kasi 'di ba kapag binigay pa lang ng DBM ang kanilang mga SARO o kung ano man iyong pagdedetermina kung kanino ipapamahagi ang pondo ay dapat naka-upload na. Kung susundan natin ang version ng FOI natin sa Senado, dapat naka-upload na 'yun sa kanilang website kung kanino maibibigay ang mga proyekto na 'yan o 'yung pera na 'yan. Para doon pa lamang sa puntong iyon ay mababantayan na. So ngayon kung sakali mang natanggap na 'nung senador o ng ahensya ang pondo, mag-iingat siya kasi alam niya, ay teka muna alam na ng mga tao pala na nakatanggap ako niyan. So magkakaroon ngayon ng responsibilidad, it's like looking over the shoulders of our legislators as well as the members of the government. Kapag alam nating may kamerang nakatutok sa atin, siyempre mas maayos, human nature 'yan eh. So ganoon din ang freedom of information, alam mo 'yung mga mata ng ating bayan ay nakatutok sa iyo at hindi mo pwedeng ikubli o itago ang mga impormasyon na meron ka.

Tayag: Speaking of nakatutok ang mga kamera at tsaka talagang nakamatyag ang taumbayan matapos nga 'tong mabulgar ang DAP, sa darating po na budget deliberation, wala pa po ang FOI bill, so paano niyo po babantayan ang pagbalangkas ng ating budget kasi marami sa atin ang mapaghinala dahil nga sa nabulgar na ganito.

Alamar: Baka sabihin naisingit na naman.

Poe: Ah totoo. Kasi alam mo sabi nila dati there are only 4 volumes, now I think there are 6 volumes sa ating budget kasi nga mas dumami ang line items pero meron pa rin tayong special purpose fund na binabanggit, around 500 billion. Napakahirap talaga ng bawat isang item. Pero ito naman ang masasabi ko, para sa akin ang pagtutuunan ko talaga ng pansin ay ang mga ahensiya na merong direktang tulong sa ating mamamayan katulad ng itinulak natin na dapat tumaas ang budget ng Dept. of Education, para mabigyan ng pagkain ang lahat ng severely wasted, ibig sabihin talagang buto't balat na mga bata sa public school. Mga 500,000 'yun so nagtaas ng 2 billion ang feeding program ng DepEd, so babalikan ko 'yan sa budget na talagang nandun. Pangalawa, 'yung mga sinasabing pondo para sa magsasaka, dapat tingnan din 'yun. Meron kasing ibang ahensiya na, nakakalungkot mang sabihin, katulad ng Department of Agriculture, 'yun bang sila na iyong usual suspects kasi palaging may anomalya doon. Maaaring unahin din nating tingnan 'yan. Subalit hindi lamang din 'yun, marami ding mga ibang proyekto ang gobyerno, kunyari debt servicing o kung anumang kailangang bayaran, ang dapat suriin para talagang makita kung ito ba ay kaaya-aya.

Alamar: kung nagastos talaga sa tamang pagkakagastusan. Kumbaga 'yung budget natin, ano ho?

Poe: Oo, pero mahirap Noel ah. Ang dami talaga 'nun, kaya nga ako, hindi ako eksperto sa budget, ang sanay akong budget ay dito sa bahay ko 'na iilan-ilan lang. Pero pagdating doon, talagang kakailanganin ng eksperto, kakailanganin ang mga mamamayan nating merong malasakit. Kaya nga importante na ito'y available sa public scrutiny.

Tayag: In short ma'am, magiging mabusisi kayo. Pero sabi nga nila kung hindi ka sanay sa mga budget hearing na ganyan at 'yung pagbabasa ng mga wordings na nilalagay sa budget. baka mamaya maisahan ka, di po ba?

Poe: Alam mo may mga expert diyan eh. Ang expert diyan at sanay sa budget for example, si Sen. Ralph Recto, marunong 'yan. Si Sen. Chiz, head ng finance, si Sen. Drilon, I think used to be finance also. So meron silang kanya-kanyang expertise, pati si Sen. Serge. Sa aking opisina ay talagang pinag-aaralan namin itong mabuti kasi mahirap naman na nagdudunung-dunungan na hindi mo naman pinag-aaralan tapos biglang magbibintang ka.

Ang kailangan din nating tutukan ay itong special purpose fund na 500 billion na lump sum. Okay lang naman na magkaroon ng certain contingency fund. Siguro less than 25 ang bagyo na dumadaan sa bansa natin taun-taon. Hindi mo naman pwede talagang sabihin na ito lang ang gagastusin ko sa taon na 'yan. Hindi naman pwede sa mga bagyo, sa mga rehabilitation, hindi mo malalaman ang damages until after the fact. Kaya meron din po ng konting elbow room.

Even if you have your own business, may sarili kang negosyo, alam mo 'yan, meron kang budget sa isang taon pero kukulangin ka pa rin o magkakaroon ka ng sobra so importante lang para sa akin na sige maglagay kayo ng konting lump sum, hindi ko sinasabing malaki, para sa contingency measures, pero kailangan niyan nakadetalye once na dinisburse ninyo. At nakadetalye rin kung sino ang mga tumanggap at sino ang magiging responsable. Hindi pwedeng walang command responsibility.

Tayag: So transparency at accountability pa rin?

Poe: Siyempre sa lahat ng oras.

Tayag: Pati po kasama doon sa contingency fund 'yung quick response fund.

Poe: 'Yun na nga din 'yun at kung anu-ano pa. Meron ngang debt service rin eh. Kaya sinasabi ko, hindi ba natin malalaman kung magkano talaga dapat ang bayaran natin na utang if ever. So gusto ko lang malaman bakit nagpa-fluctuate kasi. Maaaring sabihin nilang meron tayong viable interests sa computation for the loans, pero siguro dapat may parameters 'yun, otherwise mahirap naman 'yun.

Pero kung okay lang banggitin ito, kasi ako dati namahala ng ahensiya, bagama't maliit lamang iyong MTRCB. Nakita natin na sa kalagitnaan ng taon, makikita mo na mukhang magkakaroon ng sobra, tapos ang sasabihin ngayon ng iba, 'yung mga matatagal ng empleyado doon, "naku ma'am gastusin na natin 'to kasi kung hindi natin gagastusin, mawawala ito, babawasan nila ang budget natin next year," ako naman ang sinasabi ko noon, kasi siyempre galing ako sa private sector, "aba, teka muna kailangan pa ba natin ng ganyang klaseng silya, hindi na naman natin kailangan," so para bang ang temptation naman ay ubusin ninyo ang pera ninyo dahil hindi na maibabalik sa savings. Ang temptation 'nun uubusin 'yan kahit hindi kailangan.

Number two naman, 'pag sinabi mo naman na savings 'yan, ang sasabihin naman nila, sige mag-declare tayo ng savings kasi 'yan pupunta naman 'yan sa mga bonuses ng mga empleyado. So talagang kailangan in those situations, either to finish your alloted budget or to save it, kailangan may transparency where it goes or how it is saved.

Tayag: And at the same time siguro ma'am, may pagkakaiba naman halimbawa kung ikaw ay nasa private at kung ikaw ay nasa gobyerno? Sa private kapag may savings ka, siguro sige, pwedeng aprubahan ng board na gamitin natin para dito pero may approval pa rin ng board. Pero sa gobyerno, 'yung savings hindi mo basta-basta magagamit, 'di po ba?

Poe: Hindi talaga. Kukuha ka ng authorization sa DBM, 'yun ang natatandaan ko noon kung i-rerealign mo 'yun.

Tayag: So ma'am ngayon na pinag-uusapan po na hinihingi ng Pangulong Noynoy Aquino na joint resolution para i-define natin 'yung savings, kayo po ba ay handa na mag-push ng resolution to define savings?

Poe: First of all, 'pag walang definition, nabanggit lang sa ating Constitution pero hindi naman na-define nito, natural magkakaroon ng kalituhan. Importante na magkaroon ng definition, pero ito nga ang sinasabi ko, kasi 'yan nasa poder talaga 'yan ng legislation na mag-define of certain things, tapos the Supreme Court will determine based on existing laws if it's constitutional or not. Pero 'yung punto ko dito, pag mag-dedefine tayo ng ganyan, ang sinasabi ko lang, huwag tayo-tayo ang mag-define. Ibig sabihin, huwag tayong Kongreso lamang mag-dedefine, mag-imbita tayo sa consultation ng mga past DBM secretaries, sabihin na natin, isama na natin ang opposition, si Ben Diokno, isama natin ang ibang propesor ng UP, isama natin ang mga eksperto talaga sa finance at kung anumang government budget para magbigay ng tama at makatarungang depinisyon. Kasi kung kami-kami lang ang gagawa niyan, unang-una, hindi naman lahat kami eksperto diyan. Pangalawa, mapagbibintangan kami na ginagamit namin ang aming kapangyarihan upang baluktutin ang desisyon halimbawa ng Korte Suprema.

Tayag: At ngayon nga po may pagbibintang na rin na mukha doon sa House of Representatives, para bang ang Malacañang na mismo ang nagbibigay ng definition para masunod pa rin at maging legal 'yung pinag-uusapan na DAP.

Poe: Well alam mo, sa lahat naman ng legislation, meron palagi ang executive na opinyon. Tulad sa FOI nagbigay sila ng bersyon at kailangang balansehin mo din sa mga ibang nagsumite ng proposals. Maganda naman ang version na sinubmit ng Malacañang sa akin na freedom of information kaya lamang wala silang penalties in place. Ang ginawa namin, kapag hindi mo sinunod ang FOI, ito yung kaparusahan mo. Iyon ang dinagdag namin na natatandaan ko, pero hindi ko rin naman masasabi na porke't Malacañang yan, hindi naging maayos, hindi. Maayos ang kanilang version, in fact, 'yung version nila ang pinakamalapit na version doon sa sinumite ni Sen. JV na makokonsidera natin na opposition. So nasa pagbabalanse din 'yan ng binibigay sayong impormasyon. Hindi porke't Malacañang mali na o tama.

Alamar: Okay, maraming salamat po , Sen. Poe at mabuhay po kayo. Napakalinaw po ng paliwanag.

News Latest News Feed