Press Release
July 31, 2019

Grace Poe Interview Transcript dzMM with Ted Failon

Ted Failon: Hello and good morning kay Sen. Grace Poe. Ang pinakamagalang na kandidato.

Sen. Grace Poe: Good morning po, Manong, at sa lahat ng nakikinig. Magandang umaga po, hindi na po kandidato, sa awa ng Diyos.

ON DIVORCE BILL

Failon: Ma'am, akin po lamang kasing natanong kanina si Sen. Cynthia Villar, agad ko siyang natanong nga kasi kahapon po kausap ko si Sen. Tito Sotto tungkol po sa divorce bill. Ang sabi niya, dalawa daw pong Senadora ang nagpu-push nito, si Senator Risa and Senator Pia. Siya ho naman daw, medyo sabi niya pagdebatihan natin, bagama't si Ma'am Helen at saka ang kanyang dalawang anak na babae daw po ay pabor. Si Sen. Cynthia Villar, ang atin pong 'Madam Principal' in the Senate, sabi niya, 'Ako'y old-fashioned, ayoko pa niyan, saka na natin pag-usapan yan.' Sabi ko, si Senator Grace kaya? Sabi niya, hindi daw ho niya alam. Ano po ang inyong stand dito, ma'am?

Poe: Alam mo, Manong, sa buong mundo, I'm sure nabanggit na rin, tayo na lang ang isa sa dalawang bansang walang divorce. Noong una, ang aking posisyon diyan ay palakasin natin itong annulment, gawin nating mas accessible para sa lahat lalo na ang mahihirap. Kasi 'pag mayaman ka, puwede kang makipaghiwalay ng legal, pero 'pag ikaw naman ay walang pera, hindi mo puwedeng hiwalayan ng legal ang iyong asawa kasi parang ang minimum, P125,000 ang gagastusin mo para lamang ayusin 'yan. Subalit sa ngayon, 'pag nakikita ko na rin na marami sa ating mga kababaihan ang medyo naaagrabyado at saka hindi makapagsimula muli sa kanilang buhay, parang naiisip ko na rin na siguro, maganda na nga ring pagusapan 'yan at napapanahon na. Ang pinag-iingatan lang natin ay hindi ito abusuhin at gawing napakadali para lamang 'yung naisip na magpapakasal ngayon, katulad sa Las Vegas, puwede kang magpakasal kahit wala kang mga ano, overnight kasal ka na; pagkatapos ng dalawang linggo, puwedeng hiwalay na kayo, puwede ngang paggising mo hiwalay na kayo, 'wag namang gano'n. Sa tingin ko, puwede na rin nating ayusin 'yan kasi 'pag nakikita mo rin at naririnig mo ang mga istorya ng iba - hindi lang babae, may mga lalaki rin naman - halimbawa, 'yung iba, 'yung kanilang mga kabiyak ay nagtrabaho na sa ibang bansa, kinalimutan na sila ng mga naririto; o kaya kabaligtaran, naghihirap doon sa ibang bansa pero 'yung mga naiiwan naman dito, nagpapakasasa. Sana talagang seryosohin natin ang pag-aaral nito at kung ako man, kung may mga magagandang safeguards diyan, bakit hindi.

Failon: So kumbaga ho ma'am, inyo pong iba-base ang inyong desisyon dito sa pag-aaral at debate?

Poe: 'Yon, pero kung tatanungin ninyo ako ngayon kung ano ba talaga - kasi baka sabihin naman nila toeing the line na naman - parang mas gusto ko nang meron, kasi 'pag sinabi mong annulment, ang dami pa, may mga iba-iba pang kwestiyon, so tingnan natin. Pero kung kunwari, 'yan, bibilangin mo na rin ang inclination ng mga mambabatas, mas inclined po ako na suportahan 'yun sa ngayon.

Failon: Opo, so kumbaga, kung ngayon pagbobotohan po ito, ang kaisipan po ninyo, panahon na po para magkaroon tayo ng ganito pong uri ng batas with safeguards, para ho mas safe po. Ma'am, ito lang po, if I may just suggest, maganda ho siguro, ngayon pa lang po, inyo nang ipa-research sa Senado po: ilan bang Pilipino ngayon ang naghiwalay na ang couple at may kanya-kanya na hong buhay at sila po ay nagkakasundo na hindi na sila magkasuhan, kasi po bigamy 'yan kapag ikaw ay may existing marriage; doon sa babae naman po, adultery. Kasi, Ma'am, dapat po talaga may figure tayo; ilan ba ngayon ang naghiwalay na po ng walang pormalidad - nagkanya-kanya na pong buhay - kasi malaking bagay po 'yon because ngayon ma'am, ang usually din pong nagsa-suffer ay 'yung mga anak ng naghiwalay. Nagkanya-kanya tayo ng buhay, may mga anak tayo pareho sa ating marriage, naghiwalay tayo, and then mayroon akong kinakasama ngayon na bago, may anak din kami, so itong mga batang ito, dahil sa kawalan po ng basbas ng Estado sa kanilang pagsasama, ang tawag sa kanila ay mga illegitimate.

Poe: Oo, hindi sila legal.

Failon: Bastardo ang tawag sa kanila. So sa figures po mismo ma'am, makapagsasabi kung gaano po karami ito, maliban doon sa survey na karamihan po sa mga kababaihan, lalo na, ay sang-ayon dito sa mga dahilan po na laging agrabyado ang mga babae, 'yan po usually ang problema. 'Yung babae kasi, 'pag married na siya, takot siyang maki-apid, kasi 'pag dinemanda siya, ang laki ng problema niya. Ang lalaki, ang lakas ng loob, nakiki-apid kaagad sa iba. Alam niyo ho 'yun, ma'am, doon po talo ang babae.

Poe: Oo, salamat, Manong. Alam mo actually, ang batas sa adultery, ang mga babae lang talaga ang palaging nadidiin doon. Pero, tama po kayo diyan, ang mga bata rin ang talagang naagrabyado kapag nagiging ilehitimo sila. Sa pag-aaral niyan kung ilan talaga ang hiwalay na, na nagkasundo na 'wag nang mag-kaso, 'yung mga datos na 'yan, maganda talagang magkaroon tayo. Ilan ba ang ilehitimong mga bata, ilan ba ang naiwan na ng kanilang mga asawa. Sige po, puwede nating kunin 'yang mga datos na 'yan.

Failon: Para makatulong sa inyong matalinong diskusyon po sa Senado kung ito'y pag-uusapan na kung saka-sakali. Sa death penalty ma'am, ano po ang inyong stand?

ON DEATH PENALTY

Poe: Manong, alam mo, napakakontrobesyal niyan ngayon.

(interview paused due to poor signal)

Failon: Ma'am sa death penalty, ano po 'yung inyong stand?

Poe: Alam mo, sabi ko nga popular ngayon ang death penalty sapagkat maraming kaalyado ang ating Pangulo. Ako naman 'pag sa tingin ko makakatulong, sumasama naman din ako sa kanilang mga adhikain. Kaya lang, ang problema ko sa death penalty, Manong, ang ating hudikatura, 'yung judicial system natin overburdened, ibig sabihin talagang grabe ang daming nakatambak na mga kaso; 'yung mga mahihirap hindi makakuha ng mga maayos na abogado o representasyon kaya kahit na nga sa mga datos ng mga nakakulong at 'yung mga nabibiktima rin, mas maraming mahihirap. So unless maayos natin ang judicial system natin, hindi po ako papayag yata - ako personal - mukhang hindi ko masusuportahan ang death penalty sa ngayon.

ON PROVINCIAL BUS BAN

Failon: Well said, Ma'am, klaro po 'yon, hindi kayo susuporta sa ngayon. Okay, Ma'am Senator, ito lang po, sa ngayon, I'm sure familiar po kayo sa mga laman ng balita, ito hong balak ng gobyerno, MMDA particularly, na magkaroon po ng provincial bus ban sa EDSA, at mayroon pong binabalak na dry run. Ako ho, I support the dry run para po magkaalaman tayo. Sa inyong komite po, Ma'am, sa public services, inyo po bang naiisip na ito po ay suriin o pag-aralan po sa pamamagitan ng hearing?

Poe: Alam mo dapat ulitin na naman, kasi dati gusto nila ilipat lahat ng mga terminal ng provincial sa labas na ng boundary ng EDSA. Magandang layunin 'yan, kaya lang 'yung transfer nga ang nagiging problema. Hindi naayos 'yung paglipat do'n sa mga city buses. Mayroon din naman, maraming mga komentaryo at parang totoo naman na ang mga naapektuhan din, 'yun nga, 'yung mga pinakamahihirap na sektor dahil sila 'yung nagbu-bus; kaya parang hindi makatao 'yung paglilipat. Kaya lang, pero noong una, naisip natin, makakagaan doon sa daloy ng trapiko. Para sa akin, kailangan talagang magkaroon ng pagdinig muli; kasi hindi lamang naman 'yung mga, halimbawa provincial buses kung aalisin man, papaano na 'yung ating mga pasahero, 'yung mga mananakay. Pangalawa, 'yung mga colorum ba ay talagang tuluyan nang natanggal, kasi 'yon din, nakakadagdag din ng pagsikip ng daloy ng trapiko or kung magkakaroon ng moratorium ngayon - halimbawa, patapusin natin yung NLEX-SLEX connectors, 'yung ating (inaudible) at least 'yung (inaudible) efficiency bago tayo mag-isip na alisin lahat ng mga yan. Although sa umpisa talaga (inaudible), marami na yatang pagbabago ngayon. Gusto kong marinig ang argumento ng DOTr o ng MMDA na gawin 'yan.

Failon: So okay, so meaning po, Ma'am, nasa inyo pong balak ngayon na magpatawag po ng panibagong pagdinig po para pag-usapan po ang development dito po sa balak na ito ng gobyerno.

(line cut)

Failon: Ating balikan po ha, sorry po, talaga pong nagcho-choppy na po 'yung ating linya. In parting, ma'am, inyo pong pinag-iisipan na kayo po ay magpapatawag po ng pagdinig?

Poe: Kailangan pong magpatawag talaga ng pagdinig. Napapansin ninyo, Manong, 'pag nagiging kontrobersyal 'yung mga sagot nawawala 'yung signal.

Failon: So kayo po magpapatawag ng hearing po?

Poe: Opo...in the next two weeks. Kailangan lang nating i-submit 'yung resolution para mapatawag...Manong.

Failon: Ma'am, kami po ay mag-aantabay para po, again, para po sa kapakanan ng lahat, para po kasi kung saka-sakali ay malaman muna natin ho ang mga balak at ang mga posibleng epekto bago ho talaga magkaroon ng tuluyang pagpapatupad.

Poe: Okay, magandang umaga po at maraming salamat, Manong at sa lahat ng nakikinig.

Failon: Thank you very much.

News Latest News Feed